Bi hezaran şêniyên bajarên Qamişlo, Tirbespiyê, Amûdê û Til Hemîs ên kantona Cizîrê ji bo azadiya fîzîkî ya Rêber Abdullah Ocalan daketin qadan.
Meşevanan gotin: “Rêber Apo dibêje ‘Civakek demokratîk’, em jî dibêjin azadiya Rêber Apo azadiya civaka demokratîk e.”
Bi serpereştiya Kongra Star a bajarê Qamişloyê û di bin dirûşma “Bi Rihê Komînal û Civaka Demokratîk, Emê Bi Rêber Apo Re Azad Bijîn” li bajarê Qamişlo meşek girseyî li darxistin.
Bi hezaran şênî, sazî û dezgehên 4 bajaran; Qamişlo, Tirbespiyê, Amûdê û Til Hemîs ên kantona Cizîrê ya Bakur û Rojhilatê Sûriyeyê beşdarî meşê bûn.
Di meşê de wêneyên Rêber Apo û alên Kongra Star hatin hildan û dirûşmên “Bê Serok Jiyan Nebe” û “Bijî Berxwedana Îmralî” hatin berzkirin.
Meş ji çerxerêya Sonî dest pê kir û li çerxerêya Şehîdan a li naverasta bajêr veguherî mitîngê.
Di meşê de jinan diyar kirin ku Ji ber fikr û ramanên rêber Apo ku banga azadî û demokrasiyê dike, hîna li Îmraliyê tê dîlgirtin.
Her wiha jinan hêvî kirin ku dewletên navnetewî bi erkê xwe rabin û azadiya fîzîkî ya rêber Apo misoger bikin.
Piştî axaftinan mitîng bi diruşmên “Bê Serok Jiyan Nabe”, “Bijî Berxwedana Îmralî” û “Jin, Jiyan, Azadî” bi dawî bû.
