Êrîşên dewleta tirk a dagirker ên li dijî herêmên Bakur û Rojhilatê Sûriyê, ji aliyê Rêxistin û Komeleyên Mirovî, Heyva Sor a Kurd û Yekîtiya Rewşenbîran a herêma Cizîrê ve hat şermezarkirin.
Têkildarî daxuyaniyên ji bo şermezarkirina êrîşên bi balafirên şer û keşfê yên dewleta Tirk ên li dijî herêmê 151 Rêxistin û Komeleyên Mafên Mirovan îro bi daxuyaniyekê diyar kirin ku êrîşên dewleta Tirk a dagirker aramiya li herêmên Bakur û Rojhilatê Sûriyê têk dibe.
Rêxistin û Komeleyan gotin, êrîşên bê serûber dibe ku rê li ber karîseteke mirovî veke.
Her wiha daxwaza rawestandina êrîşan û rêzgirtina ji yasayên mirovî yên navnetewî re hate kirin.
Li aliyekî din jî Heyva Sor a Kurd li bajarê Qamişlo êrîşên dewleta Tirk a dagirker ên li dijî sivîl û çavkaniyên jiyanê yên li bakur û Rojhilatê Sûriyê bi tundî şermezar kir û da zanîn ku derketina saziyên tendrustiyê ji xizmetê wê bandore neyênî li civakê bike û nexweşî belav bibin.
Yekîtiya Rewşenbîran a herêma Cizîrê jî bi daxuyaniyekê got, Dewleta Tirk a dagirker li pêş çavên cîhanê tevahî zagonên navnetewî bin pê kir û binesaziya ku xelkên herêmê li ser jiyan dikin, dike armanc.
Yekîtiyê daxwaz ji Civaka Navnetewî, Encumena Ewlekariyê û Rêxistinên Mafên Mirovan kir ku êrîşên dewleta Tirk ên jiyana sivîlên herêmê, dike hedef rawestînin.
Yekîtiya Rewşenbîran a herêma Cizîrê bang li tevahî rewşenbîran kir ku li hemberî doza gelan bi erkên xwe rabin û ji bo şermezarkirina hovîtiya dewleta Tirk rabin ser piyan .
