DORPÊÇA HIKÛMETA ŞAMÊ AZARÊN KOÇBERÊN EFRÎNÊ ZÊDETIR DIKE

Ev demek hikûmeta Şamê dorpêça li ser kantona Şehbayê ku koçberên Efrînê lê dimînin, tundtir kiriye.

Koçberên Efrînê gotin ku bi tundkirina dorpêçê û hatina zivistanê re azarên wan zêdedtir dibin û banga li rêxistinên mirovî kirin ku bi awayekî lezgîn tevbigerin.

Di nava kampan de koçberên Efrînê jiyaneke zehmet diborînin, demsala zivistanê jî li ber deriyan e û bi wî awayî azarên wan duqattir dibin.

Tevî van astengiyan jî ew li gorî derfetên xwe li ber xwe didin, lê ev demeke Hikûmeta Şamê û firqeyên ser bi wê ve, dorpêçeke tund li ser kantona Şehbayê sepandiye.

Bi wê dorpêçê re rê li ber derbasbûna pêdiviyên sereke yên jiyanê weke derman û sotemenî tê girtin û li gorî welatiyan ev yek metirsiyeke cidî li ser jiyana wan çê dike.

Koçberên Efrînê bang li rêxistinên mirovî kirin ku bi awayekî lezgîn tevbigerin û alîkariyên pêwîst pêşkêş bikin.

Li kantona Şehbayê zêdetir ji 100 hezar koçberên Efrînê di nava 5 kampan de dijîn û Rêveberiya Xweser li gorî derfetên xwe alîkariyê ji koçberan re pêşkêş dike û li gorî rêveberiya kantonê bi tundkirina dorpêçê re rewş zehmettir dibe û rê li ber karasetekê vedibe.