CIWANÊN HELEBÊ JI BO ŞERMEZARKIRINA KOMPLOYA 15’Ê SIBATÊ MEŞEK LI DAR XISTIN

Bi sedan ciwanên bajarê Helebê ji bo şermezarkirina Komploya Navneteweyî ya li dijî Rêber Abdullah Ocalan meşeke li dar xistin.

Beşdar li pêş navenda Tevgera Ciwanên Şoreşger a Sûriyê ya li taxa Şêxmeqsûdê kom bûn, alên tevgerê, wêneyên Rêber Abdullah Ocalan û meşale hildan.

Piştî meş li tevahî kolanên taxên Şêxmeqsûd û Eşrefiyê gerî, li qada çerxerêya duyemîn a taxa Eşrefiyê veguherî mîtîngê.

Li wir axaftin li ser navê Tevgera Ciwanên Şoreşger a Sûriyê hat kirin û hate gotin ku, armanca Komploya Navneteweyî ew bû ku di şexsê Rêber Abdullah Ocalan de gelê Kurd were qirkirin.

Di dawiyê de, soza şopandina berxwedan û têkoşînê heta pêkanîna azadiya fîzîkî ya Rêber Abdullah Ocalan hate dayîn.