ŞEHÎDÊN KOMKUJIYA HELINCÊ LI CIHÊ ŞEHADETA XWE HATIN BIBÎRANÎN

Şehîdên Komkujiya Helincê di 4’emîn salvegera şehadeta xwe de, li cihê bûyerê bi merasîmekê hatin bibîranîn.

Di merasîma bîranînê de mûm hatin pêxistin û tekezî li ser berdewamkirina rêya şehîdan hate kirin.

Berêvara 23’ê Hezîrana sala 2020’an, balafirên dewleta Tirk a dagirker bi awayekî xedar maleke sivîlan li gundê Helincê yê başûrê bajarê Kobanê bombebaran kirin.

Di encama êrîşê de, xwediya malê ya 55 salî yadê Emîne Weysî û her du endamên koordînasyona Kongra Star Zehra Berkel û Hebûn Mele Xelîl şehîd bûn.

Duh 4 sal di ser şehadeta her sê pêşengan re derbas bûn ku temamê jiyana xwe ji bo azadiya gelê xwe veqetandibûn.

Di salvegera 4’emîn a şehadeta wan de, hevrêyên wan, meclisa malbatên şehîdan û nûnerên Rêveberiya Xweser berê xwe dan cihê komkujiyê û her sê şehîd bi bîr anîn.

Hevrêyên her sê jinên pêşeng wêneyên şehîdan bi kulîlkan xemilandin û bi hilkirina mûman giyanên wan ên pak û pîroz bi bîr anîn.

Di merasîma bîranînê de dayîka şehîd Şervan, Yadê Ayşe Efendî axivî û got, dijmin vîn û hêza jinan hedef digre.

Merasîma bîranîna cangoriyan bi berzkirina dirûşmeyên şehîd namirin û jin jiyan azadî bi dawî bû.

Sibe jî 9’emîn salvegera komkujiya Kobanê ye ku di encamê de zêdetirî 250 sivîl şehîd bûn.